សៀមរាប៖ ឧក្រិដ្ឋជនមួយក្រុម បានធ្វើសកម្មភាពរំដោះអ្នកទោសគ្រឿងញៀនម្នាក់ ដែលជាមេក្លោងគ្រឿងញៀនតុលាការកាត់ទោសឱ្យជាប់ពន្ធនាគារ ៥២ឆ្នាំ អំឡុងពេលដែលអ្នកទោសនោះត្រូវអនុរក្សពន្ធនាគារបញ្ជូនទៅព្យាបាលធ្មេញនៅគ្លីនិកឯកជនមួយនៅក្រុងសៀមរាប។

តាមរយៈវីដេអូពីកាម៉េរាសុវត្ថិភាពនៅក្នុងគ្លីនិកធ្មេញបង្ហាញថា នៅថ្ងៃទី១៧ ខែសីហា ឆ្នាំ២០២៣ មានជនសង្ស័យមួយក្រុមប្រដាប់ដោយអាវុធ មានសម្លៀកបំពាក់និងរបាំងមុខបិទជិតចំនួន ៤នាក់ មករំដោះអ្នកទោសជនជាតិចិនម្នាក់ ឈ្មោះ Chen Hsin Han នៅក្បែរបបរសរាជនី កន្លែងពេទ្យធ្មេញ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប រួចបានបើករថយន្តម៉ាក Lexus ទៅទុកចោលនៅជិតបុរីអាខេត ក្នុងសង្កាត់ស្វាយដង្គំ ហើយគេចខ្លួនបាត់។

ស្នងការនគរបាលខេត្តសៀមរាប លោក តេង ច័ន្ទណាត បានប្រាប់ EAC News តាមទូរស័ព្ទថា លោកមិនទាន់អាចធ្វើអត្ថាធិប្បាយជុំវិញហេតុការណ៍នេះបាននៅឡើយ ដោយសមត្ថកិច្ចកំពុងធ្វើការស៊ើបអង្កេត។

សមត្ថកិច្ចនគរបាលខេត្តសៀមរាប បានឲ្យដឹងថាអ្នកទោសជនជាតិចិនដែលបក្សពួកមករំដោះទៅនោះជាមេក្លោងជួញដូរគ្រឿងញៀន ត្រូវតុលាការកាត់ទោសឲ្យជាប់ពន្ធនាគាររយៈពេល ៥២ឆ្នាំ កាលពីឆ្នាំ២០០៩ ហើយក្នុងពេលអនុវត្តទោសនៅក្នុងពន្ធនាគារ អ្នកទោសរូបនេះមានជំងឺឈឺធ្មេញ ពិបាកទទួលទានអាហារ ត្រូវបានមន្ត្រីពន្ធនាគារបញ្ជូនមកព្យាបាល ប៉ុន្តែមិនធូរស្បើយ។

មកដល់ថ្ងៃកើតហេតុជាថ្ងៃដែលគ្រូពេទ្យបានណាត់ជួបអ្នកជំងឺ ដោយមន្ត្រីពន្ធនាគារខេត្តសៀមរាបបានបញ្ជូនអ្នកទោសរូបនោះមកព្យាបាល ខណៈពេលពេទ្យកំពុងព្យាបាលនោះ ក៏ស្រាប់តែឧក្រិដ្ឋជនមួយក្រុមប្រដាប់ដោយអាវុធ ចូលមកភ្ជង់ហើយរំដោះអ្នកទោសបានសម្រេច៕